Во пресрет на Втората регионална конференција на сметководители и овластени сметководители, која ќе се одржи на 3 април 2025 година во Скопје, разговаравме со претседателката на Институтот на сметководители и овластени сметководители (ИСОС), Весна Прентоска. Конференцијата, организирана од ИСОС, годинава се одржува под мотото: „Нова ера во сметководството – Стандардите како предизвик, технологијата како сојузник“ и претставува важен регионален настан за професионалците од оваа област.
Г-ѓа Прентоска, што претставува Втората регионална конференција за ИСОС и за професијата воопшто?
– Оваа конференција не е само уште еден стручeн собир – таа е заедничка платформа за градење на иднината на сметководствената професија во земјава и регионот. Веруваме дека само преку отворена размена на искуства и идеи со колегите и експертите од земјава и странство можеме да ги поставиме темелите за посилна, посовремена, стручна и високоетична професија. На конференцијата ќе земат учество околу 500 професионални сметководители и експерти од земјава и регионот, како и претставници од релевантни домашни и меѓународни институции, организации, од академската заедница и деловниот сектор. Нејзината главна цел е да се поттикне дијалог за иднината на сметководствената професија, преку адресирање на предизвиците поврзани со усогласување со Меѓународните стандарди за финансиско известување (МСФИ), воведувањето на ЕSG практики во финансиското известување, како и интеграцијата на новите технологии – особено вештачката интелигенција и анализата на големи податоци – во секојдневната работа на сметководителите.
Зошто токму сега темата на технологија и стандарди е клучна за сметководителите?
– Затоа што живееме во време на молскавични промени. Вештачката интелигенција, анализата на големи податоци, автоматизацијата – веќе се реалност. Нашата цел е да ги разбереме овие алатки, да ги прифатиме како сојузници и да ги интегрираме во секојдневната практика. Истовремено, примената на Меѓународните стандарди за финансиско известување и усогласеноста со ESG принципите се особено важни за современите компании, за довербата што тие сакаат да ја изградат, за нивната транспарентност и за пристапот до нови извори на финансирање. Истовремено овие аспекти се важни и за сметководителите, бидејќи ние сме главната врска помеѓу бизнисот, државата и општеството во целина. Затоа е многу важно ние да ги разбереме и прифатиме овие новини во нашата секојдневна работа и на тој начин да им помогнеме на нашите клиенти да ги достигнат нивните посакувани цели за одржлив развој.
Каква е улогата на младите во оваа нова ера на сметководството?
– Нивната улога е суштинска. Младите носат енергија, нови вештини и отвореност кон промени. Токму затоа, оваа година посебен сегмент на конференцијата им е посветен ним – на младите сметководители кои веќе работат согласно најновите стандарди и во својата работата ги применуваат најновите технологии, како и на студентите од Катедрата за сметководство и ревизија при Економскиот факултет во Скопје кои ќе бидат наши специјални гости и чии претставници ќе учествуваат во една од панел-дискусиите на конференцијата. Нивните размислувања за нас се особено драгоцени, затоа што за ИСОС тие се иднината на професијата. Токму затоа ние во наредниот период уште поактивно ќе инвестираме во нивната професионална надградба. Целта на тоа е да мотивираме и да задржиме што повеќе млади сметководители да останат овде во нашата земја и од тука да нудат современи услуги за нашите компании, но и за компании од целиот свет и при тоа да бидат одлично платени за својата работа.
Што очекувате како најголем придобивка од оваа конференција?
– Очекувам таа да биде инспирација за сите професионални сметководители во земјава, како и за оние што размислуваат во иднина да се занимаваат со оваа професија. Очекувам размена на искуства, конкретни предлози и визија за заедничка иднина. Уверена сум дека ќе ја зацврстиме регионалната соработка и ќе дадеме силен импулс за модернизација на професијата. ИСОС ќе продолжи да биде гласен и активен двигател на овие процеси.
Како ИСОС придонесува за унапредување на професијата и нејзино усогласување со глобалните текови? Кои се клучните законски надлежности на Институтот и што значат тие за професионалците во оваа област?
– ИСОС е поставен како клучна институција во професионалната регулација и поддршка на сметководителите во нашата земја. Институтот е основан со Законот за вршење на сметководствени работи, како независна, неполитичка, професионална организација која врши јавни овластувања. Издаваме уверенија за сметководители и овластени сметководители, како и лиценци за работа на трговци поединци–сметководители и друштва за вршење на сметководствени работи, водиме регистри и вршиме електронска размена на податоци од ваквите регистри со Централниот регистар и Управата за јавни приходи, го организираме системот за континуирана едукација на сметководителите, ја следиме примената на меѓународните стандарди за финансиско известување и на меѓународниот Кодекс на етика за професионални сметководители. Сето тоа обезбедува професионалност, квалитет и сигурност во системот за финансиско известување, што е од големо значење и за професионалците и за деловната заедница и за државата. Исто така, соработуваме со образовни институции, со меѓународни тела и организации, а една од нашите стратешки цели е полноправно членство во IFAC – Меѓународната федерација на сметководители, со што сметководителите од нашата земја добиваат шанса да станат рамноправни членови на глобалната заедница на милиони професионални сметководители во 135 држави ширум светот.
Која е визијата на ИСОС за иднината на професијата и како тоа се одразува во неговите активности?
– Нашата визија е јасна – модерна, стручна, високоетична професија со видливо влијание во општеството. Работиме на зголемување на угледот на сметководителите, нивно активно вклучување во креирањето на политики и создавање услови за постојан професионален развој и интернационализација на струката. Преку партнерства со домашни и меѓународни институции, организации и експерти, ИСОС и понатаму ќе се бори да се создаваат услови за напредок и поголема афирмација на професионалците во струката, за да можат тие и целата професија да го добијат местото во општеството кое дефинитивно го заслужуваат.
Избор: денар.мк